Buddy Buddy 對話卡是我們 「Be My Buddy Buddy」計劃的主要成果之一。我們結合多年來在社區工作中累積的月經知識，設計了這套卡牌，希望以輕鬆、開放的方式，延續卡牌中關於身體、月經、性別同親密關係的對話。透過更多生活化問題和知識補充，我們邀請大家一起拆解迷思、分享經驗，並練習抱持尊重和好奇心理解自己和身邊人。
對話卡為廣東話—英語雙語設計，包含 5 個不同的身份角色和 28 個引人深思的問題，讓你可以更加親密地認識自己和月經。透過我們的對話卡和深度工作坊，你可以更加深入地了解你的身體和月經週期。
我們特別感謝 onebite studio 精心打造簡潔俐落的設計，也衷心感謝 Hactl 的慷慨資助，讓這套對話卡得以順利誕生，助我們將月經知識傳遞到不同角落。
成日食止痛藥會唔會導致抗藥性？
只要服用止痛藥嘅時侯遵循正確嘅服用方法同劑量，就唔會導致抗藥性。
您對月經週期嘅唔同階段有幾了解？點樣知道自己處於邊個階段？
月經週期有四個階段：月經期、卵泡期、排卵期同黃體期。
您知道經血主要係由咩組成嗎？
經血主要係脫落的子宮內膜組織、血液同分泌物，當中只有少部分係血液。
知唔知處女膜（陰道冠）同月經有咩關係？
處女膜係陰道冠嘅俗稱，經常同月經一同被討論，但多數只因為佢哋都同女性性成熟有關。
陰道冠係環繞陰道口內側嘅一片薄膜，並唔完全遮蔽陰道口，因為喺陰道冠嘅中央通常有一個圓形嘅開口，經血就從呢個開口流出體外。
月經期間真係要戒凍飲？
本來就有經痛嘅人，飲凍飲的確可能會更痛，因為凍飲會造成血管、肌肉短時間內收縮。相反，熱敷、飲暖水則可以緩解呢種痛感。
有咩因素會影響經血嘅顏色同流量？
經血嘅顏色同子宮內膜內層靜脈、動脈嘅數量以及經血喺體內停留嘅時間有關。月經量受子宮內膜嘅厚度、子宮收縮嘅強度同血液凝固嘅程度影響。子宮內膜越厚，子宮收縮越強，血液凝固越差，月經量越多。 如果發現經血顏色改變而且持續無改善，應注意身體有無其他不適並尋求醫療建議。
講出兩種月經前會有嘅徵狀。
以下係一啲常見徵狀：頭痛、困倦同全身無力、乳房脹痛／觸痛、精神難以集中、體重增加……
講出三個處理月經需要嘅設施或者元素（例如在家中、學校、工作場所或公共廁所）。
食水設施；衛生設施如容易到達同使用、乾淨、安全、獨立、有私隱嘅廁所；設備如潔手液、廁紙、垃圾桶；可負擔嘅月經用品；充足嘅月經知識；尊重同友善嘅環境。
您覺得月經係女性專屬定係同其他性別人士都有關嘅議題？分享您嘅觀點。
跨性別人士同雙性人等群體都有機會經歷月經，所以月經並唔係生理女性嘅獨有生理經驗。再者，正確認識係理解嘅基本。我地生命裡面總會遇上有月經經驗嘅人。每個人都需要了解月經，先可以建立到一個友好、包容同有同理心嘅環境。
您有無聽過同月經有關嘅傳言、禁忌或誤會？您有無提出過挑戰？
綜觀唔同國家、宗教同文化，月經都被視為不潔、邪惡。喺尼泊爾，自初經起，女性都需要於來經嘅時候被隔離於遠離屋企嘅小木屋14日，期間唔可以返屋企、返學、入寺廟、廚房、接觸屋企人（尤其係男性），亦唔可以接觸同進食奶類製品同肉，唔可以共用社區水源，全部都係因為佢地嘅「不潔」會帶嚟污染。喺華文地區，月經嘅「不潔」同「不祥」都為來經人士帶嚟各種限制，例如唔可以隨便接觸宗教法器、唔可以進出廟宇、嚴禁坐喺放有頭盔嘅戲箱上、殯葬唔可以掂棺木、靈牌、道具、上香、企前排等。舊時嘅行人甚至會避開來經人士以免「倒霉」、「行衰運」、甚至「損陽生病」。
您知道來經者每月需要用幾多錢處理月經嗎？
喺香港，每個來經者每個月平均需要花$50喺買月經用品上面，視乎流量需要或者可能需要更多；對來經者較多或者生活較拮据嘅家庭嚟講，可以係一個幾大嘅負擔。
邊個應該對年輕人進行月經教育？分享您嘅睇法。
老師？家長？爸爸？媽媽？鄰居？朋友？社工？醫生？點解呢？
您認為月經會造成個人發展嘅障礙嗎？
研究發現，月經友善氛圍同設施嘅欠缺，會令唔少來經者被逼放棄參與社交同運動，例如因為處理月經嘅設施不足而無法參與戶外活動、受PMS影響表現但唔被理解甚至嘲笑，或者因為PMS令自己無法有穩定表現而自我形象低落等等。另外，發展中國家因水源、環境衛生同個人衛生設施（WASH facilities）不足而令女童無法返學、或者因月經禁忌而被拒絕社交接觸等，都會大大影響個人資本建立、生理同心理健康，甚至生命安全。
*”WASH 設施” 為食水、個人及環境衞生（Water, Sanitation, and Hygiene）設施的簡稱，涵蓋水源、環境衛生、個人衛生、廢棄物管理和環境清潔等基建及服務設施。